मङ्सिर १० देखि लैङ्गिक हिंसा विरुद्धको १६ दिने अभियान मनाइँदै

‘हामी सबैको प्रतिबद्धताः लैङ्गिक हिंसा अन्त्यको लागि एक्यबद्धता’ भन्ने राष्ट्रिय नाराका साथ यहि मङ्सिर १० गतेदेखि लैङ्गिक हिंसा विरुद्धको १६ दिने अभियान मनाइँने भएको छ ।

उक्त अभियानअन्तर्गत महिला, बालबालिका तथा ज्येष्ठ नागरिक मन्त्रालयले विगतमा जस्तै गैरसरकारी सङ्घसस्थासँग सहकार्य गरेर माइतीघर मण्डलादेखि भृकुटीमण्डपसम्म र्याली आयोजना गर्न लागेको छ । मङ्सिर १० गतेदेखि सुरु हुन लागेको अभियानका लागि मन्त्रालयले विगतमा जस्तै चेतनामूलक कार्यक्रममा जोड दिएको मन्त्रालयका लैङ्गिक हिंसा निवारण सम्पर्क व्यक्ति ममता विष्टले बताउनु भयो ।

विष्टका अनुसार लैङ्गिक हिंसा विरुद्धको १६ दिने अभियान मनाउनको लागि रु १० लाख बजेट छुट्टाइएको छ । मन्त्रालयले प्रदेशमा भएका विभिन्न सांसदसँग हिंसाविरुद्धको जनचेतनामूलक अभियानमाथि छलफल गर्ने, सम्बन्धित सङ्घसंस्थासँग अभियानमा सहकार्य गर्ने, शिक्षा मन्त्रालयमार्फत विद्यालयमा हिंसा विरुद्धको जनचेतनामूलक कार्यक्रम सञ्चालन गर्न आह्वान गरिएको उहाले जानकारी दिनु भयो ।

“जनचेतना अभिवृद्धि गर्ने बुक लेट निकाल्ने कार्यसमेत हुँदैछ”, विष्टले भनिन्, “यो हिंसाविरुद्धको अभियान हो । त्यसैले हरेक दिन केही न केही जनचेतनामूलक कार्य गरिरहने तालिका छ ।” उनले विगतमा जस्तै अभियानकै रुपमा मन्त्रालयले १६ दिने कार्यक्रम निरन्तरता दिइहरेकोछ बताउनु भयो ।

महिला विरुद्धको हिंसा उन्मूलनको अन्तर्राष्ट्रिय दिवस (नोभेम्बर–२५) मा सुरु भई अन्तर्राष्ट्रिय मानवअधिकार दिवस (डिसेम्बर १०) का दिन यस १६ दिने अभियान समापन हुने गर्छ । सन् १९९१ मा महिलाको विश्वव्यापी नेतृत्व रुपी संस्थानले यस अभियानको आयोजना गरेको थियो । विश्वका एक सय ८७ देशले यो अभियान मनाउँदै आएका छन् ।