गोली चल्दा अमेरिकाका पूर्वराष्ट्रपति ट्रम्प घाइते

तस्विर :सामाजिक संजाल बाट

३० असार ,२०८१:   अमेरिकी पूर्व राष्ट्रपति डोनाल्ड ट्रम्पलाई पेन्सलभिनिया राज्यको एक राजनीतिक भेलामा सहभागी भएका बेला गोली प्रहार भएको छ । गोली ट्रम्पको कानमा लागेको जनाइएको छ ।

ट्रम्पमाथि गोली प्रहार गर्ने बन्दुकधारीलाई गोप्य सेवाका सदस्यले गरेको कारवाहीका क्रममा मृत्यु भइसकेको छ । ट्रम्ममाथि बटलर पेन्सलभेनियामा भएको कार्यक्रममा हत्याको प्रयास भएको सुरक्षा अधिकारीहरुले बताएका छन् ।

बन्दुकधारीलाई गोली हान्ने क्रममा अर्का एक मानिसको पनि मृत्यु भएको बताइएको छ । स्थानीय अधिकारीका अनुसार घटनामा अर्का एक मानिस समेत गम्भीर घाइते भएका छन् ।

कार्यक्रमका एक प्रत्यक्षदर्शीले गोली चल्नु अघि राइफल बोकेका एक मानिस नजिकैको छतमा देखेको बताएका छन् ।

सार्वजनिक भएको भिडियोमा गोली लागेपछि ट्रम्प भुइमा खसेको र अनुहार रगतले लतपतिएको देखिन्छ । घटनाका विषयमा थप अनुसन्धान भइरहेको छ ।