धादिङमा आँखुको सुसेली’ पुस्तक लोकार्पण

धादिङ:        धादिङको सदरमुकाम धादिङबेशीमा कर्मचारी मिलन केन्द्र धादिङले ‘आँखुको सुसेली’ पुस्तकको लोकार्पण गरेको छ। मंगलबार कृषि तथा पशुपन्छी विकास मन्त्री रामनाथ अधिकारीले ‘आँखुको सुसेली’ पुस्तकको विमोचन गर्नुभएको हो ।

कार्यक्रममा बोल्दै कर्मचारी मिलन केन्द्र धादिङका अध्यक्ष विष्णु प्रसाद आचार्यले ‘आँखुको सुसेली’ पुस्तक साहित्य, शिक्षा, र स्थानीय सन्दर्भलाई समेट्दै तयार पारिएको महत्त्वपूर्ण कृति भएको बताउनुभयो।

पुस्तक चार खण्डमा विभाजित रहेको जानकारी दिँदै आचार्यले पहिलो खण्डमा साहित्यिक सिर्जना, दोस्रो खण्डमा धादिङका सन्दर्भहरू, तेस्रो खण्डमा शैक्षिक विषयवस्तुहरू, र चौथो खण्डमा कविता, गीत, गजलजस्ता रचनात्मक सामग्री समावेश गरिएको बताउनुभयो ।

उहाँले यो पुस्तकले पाठकहरूलाई ज्ञान र मनोरञ्जन दुवै प्रदान गर्ने विश्वास व्यक्त गर्दै निकट भविष्यमा धादिङमा बृहत् बागमती साहित्यिक महोत्सवको आयोजना गरिने समेत बताउनु भयो ।

कार्यक्रममा कृषि तथा पशुपन्छी विकास मन्त्री रामनाथ अधिकारीले पुस्तक प्रकाशनलाई धादिङका कर्मचारीहरूको अध्ययनशील र सिर्जनात्मक सोचको उदाहरणका रूपमा व्याख्या गर्नुभयो। उहाँले जनताको सेवा गर्ने उद्देश्यले आएका कर्मचारीहरूले आफ्नो व्यस्तताको बाबजुद पनि समय निकालेर यस्तो उपयोगी कृति तयार पार्नु सराहनीय भएको बताउनुभयो।

मन्त्री अधिकारीले दुर्गम क्षेत्रबाट सदरमुकाम आउने नागरिकहरूले पाउनुपर्ने आवश्यक सेवासुविधा प्रदान गर्न कर्मचारीहरूले अझै जिम्मेवारीका साथ काम गर्नुपर्नेमा जोड दिनुभयो।

त्यसैगरी, प्रमुख जिल्ला अधिकारी सुमन घिमिरेले ‘आँखुको सुसेली’ जस्तै धादिङको प्राकृतिक सौन्दर्य र सामाजिक परिप्रेक्षलाई उजागर गर्न सक्ने ‘बुढीगण्डकीको सुसेली’ जस्ता कृतिहरू प्रकाशन गर्न प्रेरणा प्रदान गर्न आग्रह गर्नुभयो। उहाँले यस प्रकारका कृतिले धादिङको सांस्कृतिक, शैक्षिक, र सामाजिक विकासमा महत्वपूर्ण योगदान पुराएको विश्वास व्यक्त गर्नुभयो।

लामो समयपछि प्रकाशन भएको पूस्तकमा साहित्य, शिक्षा, र धादिङका विषयमा समेटिएको हुँदा एक पटक अवश्य पढ्नको लागि डा। नविन वन्दु पहाडिले आग्रह गर्नुभएको छ ।

कार्यक्रममा विभिन्न साहित्यकार, शिक्षाविद्, र स्थानीय व्यक्तित्वहरूको उपस्थिति रहेको थियो।