आउँदो माघ १५ गतेदेखि त्रिभुवन विमानस्थल दैनिक ८ घण्टा बन्द हुने

दैनिक १० घण्टा बन्द हुँदै आएको त्रिभुवन अन्तर्राष्ट्रिय विमानस्थल आउँदो माघ १५ गतेदेखि दैनिक आठ घण्टा मात्र बन्द हुने भएको छ । विमानस्थलको धावनमार्ग र जहाज गुड्ने ट्र्याक अर्थात् ट्याक्सी–वेको विस्तार गर्न गएको कात्तिक २३ गतेदेखि विमानस्थल राति १० बजेदेखि बिहान ८ बजेसम्म दैनिक १० घण्टा बन्द हुँदै आएको थियो । तर आउँदो माघ १५ गतेदेखि राति ११ बजेदेखि बिहान ७ बजेसम्म मात्रै विमानस्थल बन्द हुने नेपाल नागरिक उड्डयन प्राधिकरण (क्यान) ले जनाएको छ ।

निर्माणको कामले गति लिएको र काम सहज बन्दै गएकोले विमानस्थल खुल्ने समय दैनिक दुई घण्टा थप्न लागिएको क्यानले जनाएको छ । त्रिभुवन विमानस्थल दैनिक १० घण्टा बन्द हुँदा हवाई कम्पनीले उडान कटौती गर्दा भाडा चर्को भएको छ ।