कविता : कृषि

लागौं है कृषि क्रान्तिमा

कृषक हो, ल्याऊँ नयाँ धारणा ,

रोपौ उन्नत बीउ हाइबृडका

पूरा गरौं चाहना,

गोठे गोबर खादले जमिन

यो पारी अझै उर्वर ,

पैदावार बढाउ है कृषक हो

निश्चिन्त भै दोब्बर ।

माटोको क्षमता बढाउन

सके बाँच्ने छ यो जीवन

माटोमा ममता मिसाउन

सके हाँस्ने छ यो जीवन ,

माटोको गुण उर्वरापन गए

अस्तित्व नै के छ र ?

सारा सृष्टि छ आज यही

भरमा माटो पियारो घर।

बाली भिन्न प्रजातिका

असल ती आलो र पालो गरि,

रोपे बढ्दछ उब्जनी कृषक

हो विज्ञानको पद्धति ,

माटोको गुण त्यो परीक्षण

गरी खेती सबैले गरे,

तर्कारी फलफूल अन्न

सहजै फल्नेछ यो निश्चय ।।

विष्णु प्रसाद गौतम