ब्रेक शु बाट निकालिएको सुन करिब ६१ किलो, भोली गालिने

२९ साउन ,कवि थापा मगर ।       त्रिभुवन अन्तर्राष्ट्रिय विमानस्थल भन्सार कार्यालयबाट बरामद एक क्विन्टल भनिएको सुन ’ब्रेक शु’बाट निकालिएको छ । बे्रक सु सहित १५५ केजी रहेको सुन आज निकालेर जोख्दा ६० किलो ७८९ ग्राम भएको प्रहरी नायब महानिरीक्षक कुबेर कडायतले जानकारी दिनुभयो । उहाँका अनुसार केही कालो वस्तु मिसिएकाले छुट्याउन बाँकी रहेको छ । टक्सार महाशाखा प्रमुख थानेश्वर आचार्यका अनुसार भोली साढे १० बजेबाट सुन गाल्न सुरु गरिनेछ । गत साउन ३ गते उक्त सुन काठमाडौँको सिनमंगलबाट प्रहरीले नियन्त्रणमा लिएको थियो । यसअघि करिब १०० किलो सुन भनिएको थियो । पहिले ब्रेक शुसहित जोख्दा १५५ किलो भएको थियो । आज राजस्व अनुसन्धान विभागको पत्र प्राप्त भएपछि दिउँसो प्रत्यक्ष प्रसारण नै गरेर राष्ट्र बैंकको टक्सार महाशाखामा राखिएको सुन बे्रक सुबाट निकालिएको हो ।