धर्मशाला निर्माणको लागि आवश्यक रकम उपलब्ध गराउछु :मुख्यमन्त्री जम्मकटेल

धादिङ,१४ माघ ।  बागमती प्रदेशका मुख्यमन्त्री शालिकराम जम्मकटेलले परेवाटारमा धर्मशाला निर्माणको लागि आवश्यक रकम उपलब्ध गराउने प्रतिबद्धता व्यक्त गर्नुभएको छ । शुक्रबार धादिङको सिद्धलेक गाउँपालिका–६ कुम्पुर परेवाटारमा जारी श्रीमद भागवत सप्ताह धनधाञ्यचल ज्ञान महायज्ञलाई सम्बोधन गर्दै मुख्यमन्त्री जम्मकटेलले शिव मन्दिर, चण्डिकादेवी एवम बिशाल धर्मशाला सम्पन्न गर्न आवश्यक सम्पुर्ण रकम उपलब्ध गराउने प्रतिबद्धता व्यक्त गर्नुभएको हो । उहाँले सिद्धलेकको समृद्धिमा टेवा पुग्ने भन्दै सबै मिलेर धर्मशाला निर्माण गर्नुपर्ने बताउनुभयो । जसरी भएपनि सम्पन्न गर्ने र यसैबर्ष बाट काम सुरु गर्ने पनि प्रतिबद्धता व्यक्त गर्नुभएको छ । उहाँले धादिङमा थुर्पै धार्मिक स्थलहरु निर्माणमा सहयोग गरेको भन्दै उहाँले बोलेको कुरा पुरा गर्नुपर्ने बताउनुभयो । ३ करोड लागतमा शिव मन्दिर, चण्डिकादेवी एवम बिशाल धर्मशाला २ बर्ष भित्र सम्पन्न गर्ने लक्ष्यसहित माघ ८ गतेदेखी परेवाटारमा अवस्थित लक्ष्मी नारायण मन्दिर प्राङ्गणमा चण्डेश्वर शिव मन्दिर, चण्डिकादेवी एवम बिशाल धर्मशाला निर्माणार्थ आयोजित संगितमय श्रीमद भागवत सप्ताह धनधाञ्यचल ज्ञान महायज्ञ एवम परेवाटार धार्मिक महोत्सव जारी रहेको छ । दान अहिले नगरे कहिले गर्ने,हामिले नगरे कसले गर्ने र यहाँ नगरे कहाँ गर्ने भन्ने मुल मन्त्रको साथ जारी भागवतको कथा वाचन बालतपस्वी पण्डित उत्तम भट्ट महाराजले गर्नुभएको छ । महायज्ञमा २१ हजार भन्दा माथि दान गर्नेहरूको नाम शिलालेखमा लेखिने आयोजकले जनाएको छ। महायज्ञमा प्रत्येक दिन विहान ७ बजेदेखि १० बजेसम्म नित्य पूजा तथा पाठ पारायण हवन, प्रत्येक दिन विहान १० बजे देखि ५ बजेसम्म संगितमय श्रीमद् भागवत कथा वाचन सहित दाता सम्मान, प्रत्येक दिन बेलुकी ७ बजेदेखि १० बजेसम्म महात्म्य कथा भजन कृतन र झाँकी प्रदर्शन हुने गरेको छ ।